前未婚妻返英陪過年　安素享齊人之福

車路士中場安素費南迪斯，上月初突然宣布同拍拖6年嘅未婚妻Valentina Cervantes分手，之後更極速傳出搭上女歌星Nicki Nicole，不過Valentina就非常大方，表明唔介意安素另結新歡，更會帶埋一對仔女飛返英國陪安素過新年，令安素盡享齊人之福。

Valentina同安素宣布分手後已飛返阿根廷，但佢強調兩人「再見亦是朋友」，佢日前證明會帶仔女返英國同安素過年：「安素本來叫我哋返嚟過聖誕，不過仔女喺阿根廷有更多堂兄弟姊妹，一齊拆禮物會更有意義。我哋會喺31號飛去英國過年同住幾日，我同安素會盡最大努力令仔女開心。」

對於安素搭上Nicki Nicole嘅傳聞，Valentin表示：「我當然有問佢，安素話冇咁嘅事，我想知只不過因為我係仔女嘅媽媽，安素之後有咩戀情都係佢嘅自由，我哋應承對方，邊個之後搵到另一半都會通知對方。」Valentina透露：「安素希望專注足球事業，佢想搵番最好嘅自己，好幸運佢近期表現出色，我戥佢開心。」