前未婚妻返英陪过年　安素享齐人之福

车路士中场安素费南迪斯，上月初突然宣布同拍拖6年嘅未婚妻Valentina Cervantes分手，之后更极速传出搭上女歌星Nicki Nicole，不过Valentina就非常大方，表明唔介意安素另结新欢，更会带埋一对仔女飞返英国陪安素过新年，令安素尽享齐人之福。

Valentina同安素宣布分手后已飞返阿根廷，但佢强调两人“再见亦是朋友”，佢日前证明会带仔女返英国同安素过年：“安素本来叫我哋返嚟过圣诞，不过仔女喺阿根廷有更多堂兄弟姊妹，一齐拆礼物会更有意义。我哋会喺31号飞去英国过年同住几日，我同安素会尽最大努力令仔女开心。”

对于安素搭上Nicki Nicole嘅传闻，Valentin表示：“我当然有问佢，安素话冇咁嘅事，我想知只不过因为我系仔女嘅妈妈，安素之后有咩恋情都系佢嘅自由，我哋应承对方，边个之后搵到另一半都会通知对方。”Valentina透露：“安素希望专注足球事业，佢想搵番最好嘅自己，好幸运佢近期表现出色，我戥佢开心。”