兩個月即玩完　「大肚腩」巴神面臨被解約

巴洛迪利10月底以自由身加盟意甲球隊熱拿亞，但一手促成簽入佢嘅教練基拿甸奴上月被炒之後，呢位34歲前意大利國腳被新帥韋拉投閒置散，可能提早下月解約離隊。

巴洛迪利今夏離開土耳其球隊阿達納鐵路後，一度冇球會收留，直至10月28日先至獲熱拿亞提供短期合約，簽約至2025年6月，當時熱拿亞主帥基拿甸奴認為「巴神」可以提升球隊攻力。不過，事與願違，巴洛迪利加盟後冇作為，而且身體超重，甚至有大肚腩。

基拿甸奴上月中被炒，由法國名宿韋拉接手領軍，佢無意留用「巴神」，周六(28日)晚意甲，更將巴洛迪利踢出大軍名單，熱拿亞作客以2比1擊敗安玻里，近4場首次贏波，證明球隊根本唔需要「巴神」。

意大利傳媒指熱拿亞準備提早同巴洛迪利解約，節省人工支出，盛傳已有其他聯賽球會想簽入「巴神」。