熱刺失分普帥傷心　麥迪臣完場拉隊Happy

周日(29日)英超賽事，熱刺主場「臨尾香」被狼隊逼和2比2，近3場聯賽1和2負只得1分，領隊普斯迪高路賽後表示「傷心」，不過占士麥迪臣同班倫莊臣就好少理，完場後即去睇飛鏢比賽笑逐顏開，非常Happy。

狼隊7分鐘由黃喜燦入波領先，不過熱刺5分鐘後就由賓坦古亞追平，熱刺隨後有孫興民12碼宴客，但完半場前仍靠班倫莊臣入波反超前。狼隊未有放棄，完場前3分鐘佐真拿臣窄角度狂抽近柱網網，為狼隊追平2比2完場。

熱刺連績5場聯賽主場不勝，係2008年後首次，領隊普斯迪高路賽後表示：「我覺得好心傷，因為我需要為成績負上所有責任，當我見到球員盡晒力作戰，但得唔到應得結果，我覺得好傷心，我要搵方法帶領球隊走出低谷。」

普帥「傷心」，但球員似乎唔係咁在乎，占士麥迪臣同班倫莊臣喺賽後幾個鐘，被影到同幾個朋友一齊去睇飛鏢比賽，而且不時睇到開懷大笑，將近期英超嘅失意拋之腦後。