AC米蘭僅和羅馬　方辛加宣布：我已被炒！

周一(30日)凌晨意甲，AC米蘭主場被羅馬逼和1比1，近4場聯賽第3度失分，教練方辛加賽後搶先球會證實：「我已被炒！」據報另一葡萄牙教練沙治奧干斯卡奧已同意接任，並會簽約至2026年。

賽前有指今場係方辛加嘅生死戰，AC米蘭16分鐘由雷恩達斯先拔頭籌，不過羅馬23分鐘就由保羅戴巴拿追平，最終1比1完場。方辛加賽後訪問表示：「我冇同球會高層傾過，所以冇嘢好講，我從來都係忠實咁去工作，所以冇嘢好怕。」

不過當方辛加揸車離開嗰陣，再被記者截停追問係咪最後一次離開聖西路，方辛加就老實回應：「冇錯，我會離開AC米蘭，啱啱知道我已經被炒，人生就係咁樣，我已經盡咗最大努力。」方辛加今年6月執教AC米蘭，可惜捱唔到2025年就被炒。