幾時續約利物浦？沙拿回應嚇親球迷

利物浦依家如日方中，穆罕默德沙拿嘅表現更被視為「金球獎」級數，不過續約嘅陰霾持續籠罩，對韋斯咸後被問到幾時續約利物浦，沙拿直接回應「仲差好遠」，令利迷非常擔心。

沙拿同利物浦嘅合約季尾完結，1月1號開始就可以同英超以外球會自由斟介，雖然佢全心希望留隊，但薪酬條件同利物浦傾唔掂數，令續約陷入僵局。

對韋斯咸交出1入波同2助攻後，沙拿被問到有冇接近續約，呢位埃及前鋒表示：「仲差好遠，我唔想將啲嘢拎喺媒體上講，之後其他人就說三道四，但依家係冇乜進展過，我目前只係專心幫利物浦贏英超冠軍。」