【英超】維拉折箭「細」頂白禮頓
2024年12月30日 18:00
東網電視
更多新聞短片
英超焦點戰，阿士東維拉主場硬撼白禮頓。維拉上場輸波兼有祖漢杜蘭被逐，賠了夫人又折兵，攻力受削，白禮頓近期亦火力大減，今場唔慌多波入，3.5球細盤值得捧場。（Now 624周二凌晨3時45分直播）
講到維拉近期最弗前鋒，唔係奧尼屈堅斯，而係祖漢杜蘭，佢近5場入4粒，甚至取代咗奧尼屈堅斯打正選，可惜佢上場對紐卡素時，一腳踩落法比安舒哈屁股同背脊，立即做埋紅牌阿姑，最終大敗而回。雖然有指杜蘭當時疑似係失平衡，但今仗都肯定唔使預佢，睇番維拉近5場有4次開3球或以下，今仗冇埋呢位弗爆哥倫比亞國腳，攻力再打折扣。
另邊廂，白禮頓亦唔好得幾多，近6場只得4和2負未贏過，雖然「海鷗」一向崇尚進攻，但喺老將韋碧克因傷倦勤下，前線缺少一名具把握力嘅射手壓陣，得勢不得分，代替韋碧克擔任中鋒嘅祖奧柏度冇料到，自11月尾對般尼茅夫攻入1球後，連續6場食白果，上場與賓福特互交白卷之役，更向耶莫盧克批肘堅礙眼，只因冇打中而逃過食紅牌，明顯靠唔住，難怪白禮頓呢6場入得6粒，今仗作客亦唔敢大舉出擊，細盤有計。
更多賠率：