【有片】笑爆！熱刺「雙人射門」一仆一碌

熱刺今季成績低落，球員踢到失晒魂，周日(29日)對狼隊嘅英超就出現騎呢一幕，上半場中段仲係1比1嗰陣，古路施夫斯基右路傳中，但蘇蘭基同賓坦古亞「 爭食」一齊衝去射門，結果兩人腳又起唔到，仲撞埋一齊跌到一仆一碌。雖然組織過程有越位之嫌，不過網民都紛紛嘲笑：「好代表到熱刺嘅畫面」、「如果用一段片形容熱刺呢隊波，就係呢段」、「呢套係2024年最佳笑片」......

熱刺雙人射門片段：https://x.com/i/status/1873392643511828716　

烏拉圭中場賓坦古亞之前因「種族歧視」孫興民，被罰停賽7場，復出踢咗第2場就搞出呢幕，更慘係佢喺最後補時7分鐘，無端端拎到今季第5面黃牌，搞到下場對紐卡素又要停賽。英超會喺19輪聯賽後為黃牌「洗底」，之後要累積到第8張黃牌先停賽，今場就係熱刺第19場聯賽，賓坦古亞喺「洗底」前壓哨拎黃牌，真係自己攞嚟衰。