【有片】笑爆！热刺“双人射门”一仆一碌

热刺今季成绩低落，球员踢到失晒魂，周日(29日)对狼队嘅英超就出现骑呢一幕，上半场中段仲系1比1嗰阵，古路施夫斯基右路传中，但苏兰基同宾坦古亚“ 争食”一齐冲去射门，结果两人脚又起唔到，仲撞埋一齐跌到一仆一碌。虽然组织过程有越位之嫌，不过网民都纷纷嘲笑：“好代表到热刺嘅画面”、“如果用一段片形容热刺呢队波，就系呢段”、“呢套系2024年最佳笑片”......

热刺双人射门片段：https://x.com/i/status/1873392643511828716　

乌拉圭中场宾坦古亚之前因“种族歧视”孙兴民，被罚停赛7场，复出踢咗第2场就搞出呢幕，更惨系佢喺最后补时7分钟，无端端拎到今季第5面黄牌，搞到下场对纽卡素又要停赛。英超会喺19轮联赛后为黄牌“洗底”，之后要累积到第8张黄牌先停赛，今场就系热刺第19场联赛，宾坦古亚喺“洗底”前压哨拎黄牌，真系自己攞嚟衰。