阿根廷國腳打甩強姦罪　西維爾速賣走

阿根廷球星干沙路蒙迪爾喺2023年捲入強姦官司，被指控喺2019年嘅元旦日強姦一名女子，案件日前終於告一段落，阿根廷法院正式撤銷對呢位28歲球星嘅指控，而佢效力嘅西甲球會西維爾，據報會喺今個月轉會窗將佢賣走。

右閘蒙迪爾被強姦官司困擾超過1年，阿根廷法院日前宣布，因原告嘅證供出現矛盾，決定撤銷對蒙迪爾嘅檢控。蒙迪爾表示：「我終於獲證實無罪，呢個虛假嘅指控傷害我嘅名聲同家庭，我同我懷疑嘅老婆都要承受謊言嘅禍害。」

據西班牙媒體《Relevo》報道，西維爾一直打算賣走蒙迪爾，但因為官司在身令買家卻步，依家佢獲還清白，西維爾將會喺冬季轉會窗盡快將蒙迪爾賣走，傳聞巴西球會聖保羅對佢好有興趣。