葡萄牙巨星C朗只剩下半年合約，但所屬沙特阿拉伯球會艾納斯並未打算開出新約，加上另1支沙特豪門希拉爾無意簽入呢位39歲老將，C朗隨時面臨「失業」尷尬局面。

C朗現時合約將於2025年6月30日屆滿，曾經傳出艾納斯可能同佢續約1年，令C朗保持比賽狀態，為葡萄牙出戰2026年世界盃。不過，現時情況似乎有變，艾納斯管理層仲未有表示，C朗踢完今季之後，可能冇得留隊。

雖然有傳希拉爾想邀請C朗加盟，取代尼馬，擔當球隊新生招牌，但沙特記者阿卜杜拉哈米迪最新爆料，指希拉爾冇打算簽C朗，沙特籌辦2034年世界盃嘅委員會，近日開會冇再提C朗嘅名字，似乎已預先知道佢會離開沙特。

C朗2年前離開曼聯，冇歐洲球會願意簽入佢，如果連沙特阿拉伯聯賽都企唔住，恐怕難有落腳地。