17歲新星首擔正獲好評　阿仙奴搵到沙卡替身

阿仙奴王牌球星布卡約沙卡早前重傷長抖，右翼嘅空缺難以代替，周四(2日)作客賓福特試用奇招，17歲小將尼華尼利首度喺英超擔正，出任右翼表現大獲好評，有望成為「沙卡替身」。

沙卡受傷之後，阿仙奴上場將加比爾馬天尼利由左面移去右面，不過右腳嘅佢「直線」踢法效果麻麻，今場改用尼華尼利踢右翼，「內切」打法更接近沙卡風格，阿仙奴下半場2個入球都係由佢策動。

尼華尼利以17歲286日之齡，成為阿仙奴史上第3年輕英超正選上陣球員，僅次於法比加斯(17歲103日)同禾確特(17歲212日)；尼華尼利仍然係英超史上最年輕上陣球員(15歲181日)，佢2022年9月喺英超歷史性登場，對手又係賓福特。

阿仙奴領隊阿迪達賽後表示：「尼華尼利喺青年軍都踢過右翼，重操故業係個美妙故事，佢好投入、好有決心，肯冒險同去創造，表現令人印象深刻。」