西甲官網「刪除」奧莫　拉波塔拒辭職

巴塞隆拿喺2025年即鬧出笑話，因為未符合財務條例，搞到丹尼爾奧莫同保羅域陀兩位球員未能重新註冊，下半季面臨無波可踢危機。西甲官網行動迅速，已將兩位球員喺網頁「刪除」，而受到千夫所指嘅巴塞會長拉波塔，就拒絕引咎辭職。

西甲賽會證實丹尼爾奧莫同保羅域陀重新註冊失敗後，官網已刪除兩人資料，就連查閱巴塞上半季嘅數據，兩位「被消失」嘅球員數據仍在，但相片世置只係黑色一片。西班牙足總規定球員同一季內唔可以喺同一球會兩次註冊，據報巴塞仍然希望足總可以「通融」，畀佢哋搞掂財政問題後再為球員註冊。

今次搞出大頭佛，作為會長嘅拉波塔責無旁貸，唔少球迷要求佢為事件負責下台，不過西班牙《每日體育報》報道，任期到2026年嘅拉波塔表明唔會辭職，但如果最後得唔到「圓滿結局」，拉波塔明年競選連任成功機會將大打折扣。