利物浦右閘阿歷山大阿諾特季尾約滿，今個月開始可自由同英超以外球會簽約，西甲班霸皇家馬德里已展開極力追求。據英國《太陽報》消息，皇馬將會開出高達1億鎊簽字費，利誘該英格蘭國腳加盟。

皇馬希望喺冬季轉會窗完成交易，近日開價2,000萬鎊收購，但已被利物浦拒絕，一來「紅軍」唔想喺爭標關鍵時間失去主力，另外亦希望阿諾特會回心轉意答應續約，不過目前情況唔太樂觀。

消息指阿諾特同皇馬已密斟超過半年，皇馬除咗會大幅增加佢目前喺利物浦嘅18萬鎊周薪外，最重要係同意支付高達1億鎊簽字費，方式類似皇馬上年免費簽基利安麥巴比，分5年支付1.25億鎊簽字費。

曾效力利物浦同皇馬嘅名宿奧雲表示：「皇馬將收購行動擺上台面，令我相信阿諾特去皇馬只係時間問題，如果阿諾特係想續約，皇馬唔會咁樣做，佢哋已經秘密傾咗好耐，呢單係大新聞！」