雲佬放風買人用「曼聯網絡」　2紅魔成目標

李斯特城聯賽4連敗深陷降班漩渦，領隊雲尼斯達萊準備冬季轉會窗買人救亡，佢日前放風會利用「曼聯網絡」增兵，傳聞打算向域陀連迪路夫同杜比高利亞兩名「紅魔鬼」埋手。

雲尼斯達萊被問到1月買人會唔會向曼聯出手，呢位荷蘭名宿表示：「我喺幾個國家工作過，我會用自己熟悉嘅網絡，運用佢哋去增強球隊實力，依家先要睇下球隊有咩需要，有咩位置要加強。」

據英國《太陽報》報道，曼聯中堅域陀連迪路夫係目標之一，呢位瑞典國腳今季英超只踢過57分鐘，而且合約季尾完結，曼聯絕對唔會阻佢轉會。

另外，曼聯21歲中場杜比高利亞係重點栽培新星，但球隊今季成績水深火熱下，上場機會有限，李斯特城將考慮提出借用。