云佬放风买人用“曼联网络”　2红魔成目标

李斯特城联赛4连败深陷降班漩涡，领队云尼斯达莱准备冬季转会窗买人救亡，佢日前放风会利用“曼联网络”增兵，传闻打算向域陀连迪路夫同杜比高利亚两名“红魔鬼”埋手。

云尼斯达莱被问到1月买人会唔会向曼联出手，呢位荷兰名宿表示：“我喺几个国家工作过，我会用自己熟悉嘅网络，运用佢哋去增强球队实力，依家先要睇下球队有咩需要，有咩位置要加强。”

据英国《太阳报》报道，曼联中坚域陀连迪路夫系目标之一，呢位瑞典国脚今季英超只踢过57分钟，而且合约季尾完结，曼联绝对唔会阻佢转会。

另外，曼联21岁中场杜比高利亚系重点栽培新星，但球队今季成绩水深火热下，上场机会有限，李斯特城将考虑提出借用。