A米新帥大諗頭　要簽達雲紐尼斯

意甲勁旅AC米蘭早前換帥，請來沙治奧干斯卡奧執教，呢位50歲葡萄牙名宿滿腹大計，想以先借後買方式，簽入利物浦前鋒達雲紐尼斯，提升球隊攻力，爭取打入聯賽前4位。

AC米蘭現時僅排意甲第8位，落後後第4位拉素8分，必須急起直追，否則隨時無緣下屆歐聯，沙治奧干斯卡奧認為首要工作係增強入波能力，並睇中達雲紐尼斯。

由於利物浦主帥施洛傾向用迪亞高祖達、路易斯迪亞斯出任正前鋒，令呢位25歲烏拉圭國腳上陣時間不足，今季英超14次披甲，僅入2球，近期不時傳出佢可能離隊，包括巴塞隆拿有意招攬達雲紐尼斯。AC米蘭現時亦加入爭奪，並提出清晰收購計劃，就係先借用6個月，今夏再以4,150萬鎊(約4億港元)買斷佢。

利物浦2022年豪花8,500萬鎊(約8.2億港元)轉會費向賓菲加收購達雲紐尼斯，如果接受AC米蘭報價，意味將會勁蝕一半，恐怕管理層難以接受，加上紅軍正在爭標，亦未必願意季中放走達雲紐尼斯。