傾唔掂數　沙拿重申今夏離隊

利物浦前鋒穆罕默德沙拿只剩下半年合約，現時已經可以自由同其他球會傾加盟事宜，呢位32歲埃及國腳喺「雙紅會」前夕，接受《天空體育》訪問，再次表示今季係佢最後一季效力利物浦，最希望捧英超冠軍，為8年紅軍生涯劃上圓滿句號。

利物浦上年9月英超大勝曼聯3比0後，穆罕默德沙拿已經話，會方冇人同佢傾續約，好可能今季結束後離隊。紅軍將於周一(6日)凌晨英超主場鬥紅魔鬼，沙拿又被問到是否續約，佢話：「以現時情況睇，相信係我最後一季效力利物浦，過去半年，續約問題毫無進展，之後事情點發展，大家拭目以待。我真係非常渴望捧英超冠軍，甚至多過想贏歐聯冠軍，可能因為我哋上次成為英超冠軍，並冇真正慶祝過，希望今次奪冠，做一啲特別事情。」

穆罕默德沙拿今季狀態勇猛，喺英超射入17球及13次助攻，兩項數據都排聯賽第1位，大把球會爭住簽佢，盛傳法甲勁旅巴黎聖日耳門開出3年合約，周薪高達50萬歐元(約400萬港元)嘅優厚條件，吸引沙拿加盟。