倾唔掂数　沙拿重申今夏离队

利物浦前锋穆罕默德沙拿只剩下半年合约，现时已经可以自由同其他球会倾加盟事宜，呢位32岁埃及国脚喺“双红会”前夕，接受《天空体育》访问，再次表示今季系佢最后一季效力利物浦，最希望捧英超冠军，为8年红军生涯划上圆满句号。

利物浦上年9月英超大胜曼联3比0后，穆罕默德沙拿已经话，会方冇人同佢倾续约，好可能今季结束后离队。红军将于周一(6日)凌晨英超主场斗红魔鬼，沙拿又被问到是否续约，佢话：“以现时情况睇，相信系我最后一季效力利物浦，过去半年，续约问题毫无进展，之后事情点发展，大家拭目以待。我真系非常渴望捧英超冠军，甚至多过想赢欧联冠军，可能因为我哋上次成为英超冠军，并冇真正庆祝过，希望今次夺冠，做一啲特别事情。”

穆罕默德沙拿今季状态勇猛，喺英超射入17球及13次助攻，两项数据都排联赛第1位，大把球会争住签佢，盛传法甲劲旅巴黎圣日耳门开出3年合约，周薪高达50万欧元(约400万港元)嘅优厚条件，吸引沙拿加盟。