車路士未黑完　科芬拿因傷提早收咧

英超豪門車路士近期頻頻失分之外，再受打擊，領隊馬利斯卡表示，中堅韋斯利科芬拿嘅傷勢比預期嚴重，需要休戰一段長時間，可能緣盡今季餘下賽事。

韋斯利科芬拿自上月初英超對阿士東維拉一役受傷之後，一直缺陣，馬利斯卡最新透露，呢位24歲法國國腳嘅傷勢唔樂觀：「原本估計科芬拿只會缺陣5星期，但經過更多檢查之後，收到壞消息，佢需要養傷一段長時間，我都唔知佢幾時可以復出。」

韋斯利科芬拿2022年夏天以7,000萬鎊(約6.8億港元)轉會費，由李斯特城加盟車路士後，長期受傷患問題困擾，包括缺陣上季所有賽事，今季復出後，踢咗12場英超又要長抖。

加上車路士另1位中堅班洛特巴迪亞舒尼亦因傷，需要休戰一段長時間，馬利斯卡表示，唔排除今個月簽入中堅救亡。