【有片】馬古尼世紀失機　係舒克斯嘅錯？

曼聯喺「雙紅會」踢出今季代表作，頹勢作客利物浦都可以逼和對手，補時最後一刻更有哈利馬古尼喺龍門口射高，錯失絕殺黃金機會。事實上馬古尼今場表現出色，前利物浦球星史杜列治更指出，馬古尼失機係因為約舒亞舒克斯「傳得衰」，該荷蘭前鋒先係罪人。

馬古尼世紀失機片後：https://x.com/i/status/1876056786631016749　

曼聯尾段心雄想贏，連馬古尼都推埋上前面，結果舒克斯有單刀機會唔射，傳畀無人看管嘅馬古尼竟然射高，場上一眾曼聯球員見到後都碌晒地。史杜列治就話：「舒克斯點會交個咁嘅波，佢有大把時間去做好呢個回傳，佢係一個踢緊曼聯嘅英超球員，我係馬古尼嘅話，都唔會預期隊友喺3碼外交個咁嘅波！」

至於曼聯領隊魯賓艾摩廉就拒絕責怪球員：「舒克斯本身個位都可以射門，但佢做出一個完美決定(傳球)。對我嚟講，錯失一個機會或者交失一個波都唔係大問題，最重要係馬古尼落到球場會獻出每一分力，呢一點先係最重要。」