密會曝光！樸達執教韋斯咸好事近

韋斯咸今季喺英超成績低迷，上年先上任嘅領隊盧比迪古一直被傳帥位不穩，隨住最近2場聯賽慘敗後，換帥一事勢在必行，網上更流出韋斯咸總監史甸頓同前車路士領隊樸達密會相片，成事機會唔細。

韋斯咸近2仗被利物浦同曼城大炒，依家排喺第14位，盛傳佢哋想斟樸達接手，而社交平台X帳號WestHam_Central更公開一張酒店偷拍相片，見到史甸頓正同樸達見面。

49歲嘅樸達自2023年離開車路士後，一直未有落班。英國《天空體育》消息指，韋斯咸如果同樸達傾掂，就會正式將盧比迪古炒魷。