傳聞C朗轉戰日職　紅鑽總監咁回應

沙特豪門艾納斯同C朗今夏約滿，呢位葡萄牙巨星下一站去向成謎，早前有報道C朗將轉戰日職，加盟浦和紅鑽，紅鑽體育總監堀之內聖對此回應：吓？真係㗎？

C朗曾表示希望出席2026年世界盃，因此假如佢約滿離開艾納斯，肯定會搵班落，日職水平高之餘，亦係唔少過氣世界級巨星落腳地，近年就有恩尼斯達同費蘭度托利斯征戰日職，有報道指C朗可能加盟浦和紅鑽。

紅鑽體育總監堀之內聖回應指：「我要避免透露具體增兵名單，關於C朗嘅報道我都有睇，亦從身邊人聽講過，畀人嘅感覺係『吓？真係㗎？』而我哋仲搵緊外援。」

佢補充：「大牌球員嘅定義好複雜，只要為球隊全力比賽，無論係邊個都會一視同仁，我較重視球員實力同為球隊效力嘅意願。」