瑞典黑白雙煞玩晒　約基利斯射爆波圖

阿歷山大伊沙克喺英聯盃4強首回合入波，協助紐卡素以2比0擊敗阿仙奴之外，佢嘅瑞典國家隊鋒線拍檔約基利斯亦有波入，喺周三(8日)凌晨葡聯盃4強，射入全場唯一入球，帶領士砵亭以1比0小勝波圖，率先打入決賽。

波圖上半場曾經有1次黃金機會，中場尼高干沙利斯射門僅貼柱出界，之後輪到約基利斯表演，左路個人突破，扣入中路起腳，同樣貼柱出界。

戰至56分鐘，士砵亭17歲新星昆達作出妙傳，約基利斯冷靜射入，呢位26歲前鋒繼上場葡超對甘馬雷斯，上演「帽子戲法」之後，踏入2025年2場比賽都有波入，成為曼聯、皇馬、拜仁慕尼黑等大球會搶奪目標，估計約基利斯現時身價達7,500萬歐元(約6億港元)。

葡聯盃4強一戰定生死，士砵亭晉級決賽之後，將會同賓菲加對布拉加嘅勝方爭冠。