雲尼斯奧斯獲輕判　僅停賽2場西甲

皇馬翼鋒雲尼斯奧斯祖利亞上輪西甲對華倫西亞，做出復報動作，推跌對手門將迪米查夫斯基，被球證出示紅牌趕出場，更深深不忿指罵球證，幾乎想出手打對方，西班牙傳媒一度指呢位24歲巴西國腳面臨停賽4至12場。不過，西甲賽會最終裁定「小雲」只需要停賽2場聯賽，簡直係「皇恩浩蕩」。

據悉西甲賽會調查後，認為雲尼斯奧斯祖利亞當時遭迪米查夫斯基挑釁，被對方扯頭髮，考慮各種因素後，輕判佢未來2場西甲停賽，罰款600歐元(約4,800港元)，皇馬因為未能管理好球員，被罰款700歐元(約5,600港元)。根據《The Athletic》報道，皇馬會長皮里茲對於判決結果，仍然感到不滿，計劃提出上訴。

雖然「小雲」將無緣未來2場聯賽對拉斯彭馬斯、華拉度列，但呢兩支對手都係弱隊，佢缺陣對於皇馬影響不大。最重要係呢位世界足球先生可以為皇馬出戰嚟緊西超盃4強對馬略卡，如果「銀河艦隊」打入決賽，佢都可以披甲。