明奈「學壞咗」要求20萬鎊周薪　車路士趁機挖角

曼聯中場明奈近年迅速冒起，已成為球隊主力，呢位19歲新星仲有2年半合約在身，根據英國《每日郵報》爆料，明奈要求大幅加人工至20萬鎊(約194萬港元)周薪，令續約談判陷入僵局，車路士想趁機收購呢位英格蘭國腳。

明奈上季表現一鳴驚人，為曼聯各項賽事上陣32場入5球，並入選英格蘭國家隊出戰上年歐國盃。呢位新星2023年2月同曼聯續約至2027年6月，現時周薪為2萬鎊，屬於隊內低薪一族，紅魔鬼願意向明奈開出6萬鎊周薪新合約，但佢嘅經理人團隊認為會方出手太低，提出應該同其他主力睇齊，起碼要20萬鎊周薪，令正在削減成本嘅管理層卻步。

曼聯上年曾經將3位新世代主力海倫、阿歷真度加拿祖、明奈列為非賣品，但如果明奈「跳草裙舞」拒絕續約，會方可能改變主意出售佢。據悉車路士正在密切留意明奈動向，計劃簽入佢，曼聯近年有唔少主力高薪續約後，表現走下坡，最明顯例子係拉舒福特，網民指明奈依家都「學壞咗」。