明奈“学坏咗”要求20万镑周薪　车路士趁机挖角

曼联中场明奈近年迅速冒起，已成为球队主力，呢位19岁新星仲有2年半合约在身，根据英国《每日邮报》爆料，明奈要求大幅加人工至20万镑(约194万港元)周薪，令续约谈判陷入僵局，车路士想趁机收购呢位英格兰国脚。

明奈上季表现一鸣惊人，为曼联各项赛事上阵32场入5球，并入选英格兰国家队出战上年欧国杯。呢位新星2023年2月同曼联续约至2027年6月，现时周薪为2万镑，属于队内低薪一族，红魔鬼愿意向明奈开出6万镑周薪新合约，但佢嘅经理人团队认为会方出手太低，提出应该同其他主力睇齐，起码要20万镑周薪，令正在削减成本嘅管理层却步。

曼联上年曾经将3位新世代主力海伦、阿历真度加拿祖、明奈列为非卖品，但如果明奈“跳草裙舞”拒绝续约，会方可能改变主意出售佢。据悉车路士正在密切留意明奈动向，计划签入佢，曼联近年有唔少主力高薪续约后，表现走下坡，最明显例子系拉舒福特，网民指明奈依家都“学坏咗”。