英超三雄爭奪「德甲沙拿」　法蘭克福要求呢個價

法蘭克福今季德甲排第3位，前鋒馬莫殊功不可沒，呢位25歲埃及國腳射入13個聯賽入球，僅次於入14球嘅拜仁慕尼黑神鋒哈利卡尼，並貢獻7次助攻，名副其實能傳擅射，令佢成為今個月冬季轉會市場搶手貨。曼城已派人斟介呢位「新沙拿」，法蘭克福要求最少6,000萬歐元(約4.85億港元)轉會費。

根據《天空體育》爆料，曼城會方近期已聯絡馬莫殊嘅經理人，開出一份5年合約，法蘭克福方面眼見「藍月亮」急需要增兵救亡，趁機開天索價，必須要有6,000萬歐元以上轉會費，先至會出售馬莫殊。由於曼城受到財政違規案困擾，能否滿足法蘭克福要求，實屬疑問。

馬莫殊仲有2年半合約在身，據悉利物浦、阿仙奴都有意收購佢，但馬莫殊只想加盟曼城，或者有助「藍月亮」向法蘭克福壓價。