迪甘斯證實明夏離任　施丹有望接手法國

繼早前傳出法國國家隊主帥迪甘斯將離任嘅消息後，周三（8日）佢接受傳媒訪問時，親口證實，明夏世盃決賽周結束後約滿，就會正式離隊，為擔任14年法國領隊生涯畫上句號，好大機會由另一名宿施丹接手執教。

迪甘斯於法國電視台TF1嘅節目中受訪時，明確表示：「2026年世盃決賽周將會係我作為法國主帥最後一站，凡事都有結束嘅時刻，當美好事情發生時，我哋梗係唔想佢停，但都需要知道幾時停。」

作為1998年協助法國首奪世盃嘅功勳隊長，迪甘斯2012年開始執教法國，最威水係協助球隊奪得2018年世界盃冠軍，成為史上第3位以球員及領隊身份都捧過世盃嘅傳奇人物。此外，迪甘斯亦為法國奪得2021年歐國聯冠軍，2016年歐國盃及上屆世界盃獲得亞軍，基本上已無憾。

事實上，早於上屆世盃決賽，法國互射12碼不敵阿根廷之後，已傳出迪甘斯會走人，由施丹接手領軍，但佢最終留任。據悉施丹近年拒絕曼聯等大球會邀請，就係為咗等待機會做法國主帥，以目前情況睇，再過多1年半，施丹嘅夢想就可以成真。