熱刺贏波代價大　賓坦古亞重傷入院

熱刺喺英聯盃4強首回合主場以1比0擊敗利物浦，但亦付出沉重代價，中場賓坦古亞踢到6分鐘，準備迎頂角球時，突然暈倒失去平衡倒地，並疑似失去知覺。軍醫團隊立即入場為佢進行急救，令比賽暫停9分鐘，賓坦古亞需要送院治療，幸好已經冇大礙。

當時賓坦古亞需要戴上氧氣罩，用擔架抬離場，情況非常嚴重，事後熱刺會方發表聲明話：「賓坦古亞處於清醒狀態，並入院接受進一步檢查。」領隊普斯迪高路表示，呢位27歲烏拉圭國腳頭部受傷，可能跌倒時撞傷頭。

賓坦古亞今季多災多難，因為涉嫌種族歧視隊友孫興民，早前被英足總判罰本土賽事停賽7場，直至上月底英超對諾定咸森林，先至復出，估唔到現時又受傷，未知需要缺陣幾耐。

賓坦古亞最新喺社交網報平安，話自己一切安好，感謝大家關心，並恭喜熱刺贏波。