杜辛華荷域爆醜聞　被指帶6女酒店大戰

祖雲達斯成績唔掂，前鋒杜辛華荷域入球數字偏低受詬病，有意大利狗仔隊記者爆料，杜辛華荷域被影到同6名應召女郎一齊進入當地一間酒店，據知爆料者係一名祖記球迷，呢個炸彈真係有排拆。

曾經爆出辛度東拿利同法基奧利賭波嘅記者，日前上載咗一張片段嘅截圖，並且發布咗一段報料人士嘅錄音，內容描述一架載住6人嘅車抵達酒店嘅情景，其中提到呢班人喺走廊蕩失路，要服務員引導下先搵到房間。另一段錄音則表示，報料者影低嘅閉路電視片段，清晰見到杜辛華荷域同一眾人嘅身影，錄音更顯得非常不滿：「作為祖雲達斯嘅球迷，我對此感到極度失望。」

事件喺當地正在發酵，雖然杜辛華荷域已經喺加盟祖記前同女友分手，但嫖妓始終影響到球隊及球員本身形象，最大問題係祖記成績一般，球迷不滿聲音會更多，而且此舉亦可能會嚇怕本來有意羅致佢嘅球會，影響祖記議價能力。