36歲迪馬利亞起孖　賓菲加闖決賽鬥士砵亭

周四(9日)凌晨葡聯盃4強，賓菲加以3比0大勝布拉加，36歲老將迪馬利亞射入2球，果然寶刀未老。賓菲加打入決賽，將於周日(12日)凌晨同士砵亭爭冠，屆時迪馬利亞遇上對手「人氣神鋒」約基利斯，勢必大鬥射術，合演夢幻決賽。

開賽22分鐘，布拉加曾經由阿文度布馬單刀射入，但因為越位被判入球無效，賓菲加避過一劫，果然有後福，5分鐘後，迪馬利亞喺禁區右路用招牌左腳勁射入網打開紀錄。僅過1分鐘，左閘艾華路費南迪斯射成2比0，加上迪馬利亞37分鐘再次入波，賓菲加上半場已領先3球，提早奠定勝局。

迪馬利亞繼上月葡超對國民隊之後，再次梅開二度，今季各項賽事上陣25場入13球及6次助攻，可見佢即使已年屆退役年齡，仍然保持高水平發揮。呢位阿根廷翼鋒將於6月底約滿，賓菲加準備啟動續約條款，再同佢延長1年合約。