加拿祖不滿失正選想離隊　PSG趁機挖角

根據英國《泰晤士報》爆料，曼聯翼鋒阿歷真度加拿祖不滿被新領隊魯賓艾摩廉投閒置散，打算離隊，法甲豪門巴黎聖日耳門(PSG)立即有興趣簽入呢位20歲阿根廷國腳，填補基利安麥巴比離隊後嘅位置。

阿歷真度加拿祖上季為曼聯上陣50場入10球，奠定主力地位，今季坦哈格領軍期間，仍然獲得重用，但呢位荷蘭名帥被炒後，新領隊魯賓艾摩廉改用3421陣式，用海倫、阿密特迪亞路、般奴費南迪斯組成進攻鐵三角，導致加拿祖淪為後備，因而萌生去意。

曼聯為咗改善財政狀況，以符合英超「盈利及可持續發展條例」，亦準備出售球員，2位新星加拿祖、明奈都可能被掛牌，因為賣走青訓球員，被視為100%利潤，紅魔鬼上年夏天出售麥湯米尼畀拿玻里，就係呢個原因。

PSG一直想簽入翼鋒接替麥巴比，曾有意向曼聯收購拉舒福特，但呢位英格蘭國腳狀態持續低迷，現時轉為向加拿祖埋手。西甲勁旅馬體會亦睇中呢位翼鋒，加拿祖曾於馬體會青年軍受訓，2020年加入曼聯青年軍，唔排除會回巢。