多蒙特又想借「魔兵」　加入爭奪拉舒福特

曼聯前鋒拉舒福特被領隊魯賓艾摩廉打入冷宮後，盛傳好大機會今個月離隊，引來多支球隊注意，除咗意甲勁旅AC米蘭想簽佢之外，德甲球隊多蒙特亦加入爭奪，希望借用「福仔」半季，舒緩鋒線人腳不足問題。

多蒙特現時唔夠翼鋒球員，加上當耶爾馬倫可能今個月離隊，卡廉艾迪耶美剛傷愈不久，仍未恢復十足狀態，有需要簽入翼鋒。教練紐尼沙軒欣賞拉舒福特可以勝任鋒線多個位置，而且速度快，非常適合「蜜蜂兵團」快速反擊踢法。

不過，拉舒福特周薪高達32.5萬鎊(約315萬港元)，比多蒙特現時最高人工球員古拉斯多1倍，相信要曼聯承擔「福仔」部分薪酬，多蒙特先至有能力借用佢。

事實上，多蒙特上季向曼聯借用翼鋒查頓辛祖，兩間球會共同分擔人工，的確有機會再次照辦煮碗，以同樣方式借用拉舒福特。