維拉急購前鋒爭前4位　斟掂當耶爾馬倫

上季英超前4位份子阿士東維拉，今季成績退步，現時排聯賽第8位，為咗爭入前4位，奪取下屆歐聯入場券，準備趁今個月轉會市場重開增兵，並已經同多蒙特前鋒當耶爾馬倫達成口頭加盟協議，只要同「蜜蜂兵團」傾掂轉會費，就可以成事。

維拉今季要兼顧歐聯賽事，但兵源不足，令一眾主力疲於奔命，領隊艾美利認為必須增兵，目標簽入1位速度型前鋒，以配合快速反擊踢法，所以睇中當耶爾馬倫。呢位25歲荷蘭國腳今季各項賽事上陣20場入5球及1次助攻，佢只剩下1年半合約，據悉已接受維拉開出嘅待遇條件。

維拉曾經兩度向多蒙特提出報價，由原本1,600萬歐元，加碼至1,800萬歐元，但「蜜蜂兵團」要求2,000萬歐元以上轉會費，導致交易存在阻滯。