紐卡素小球迷上電視斷正　被揭逃學睇波

愛隊贏波好容易令人得意忘形，日前英聯盃4強首回合，紐卡素作客2比0擊敗阿仙奴，現場觀戰嘅球迷自然欣喜若狂，但當電視畫面影到一名小球迷慶祝時，結果揭發呢個細路係逃學睇波。

呢位小球迷社交平台名字叫「森美」，當晚紐卡素在英聯盃4強作客首回合2比0擊敗阿仙奴後，佢被電視台攝影師拍下興奮慶祝畫面，而睇波團亦將佢現場睇波張相上載上社交平台，結果被學校發現。

原來呢位小球迷事前已向學校告假，但當佢被揭發逃學睇波，學校立即向小朋友家長發電郵，表示因為喺電視見到森美，其告假申請已被取消，森美被視為曠課，家長如果想同學校商討，可以同學校聯絡。

對於森美嚟講，作客現場睇住愛隊贏波，係一次一生難忘經歷，至於佢會否因為今次逃學受罰而唔開心，則屬後話。