皇馬大勝入西超盃決賽　再同巴塞爭冠

周五(10日)凌晨西超盃4強，皇家馬德里憑下半場連入3球，以3比0大勝馬略卡晉級決賽，將會連續第3年同巴塞隆拿爭奪冠軍，之前兩屆雙方各贏1次，嚟緊決賽肯定精彩。

皇馬今場強陣出擊佔盡上風，不過受制於馬略卡硬淨防守，去到63分鐘先由祖迪比寧咸打破僵局。補時3分鐘馬略卡守將誤擺烏龍輸多粒，2分鐘後洛迪高高斯再接應傳中近門射入，助皇馬大勝3比0。

皇馬入決賽後，將會連續3年決賽同巴塞隆拿上演「國家打吡」，上屆皇馬大勝4比1奪冠，前屆就由巴塞隆拿贏3比1捧盃，如果皇馬今屆成功衞冕，就可以追平埋巴塞隆拿14次贏西超盃嘅紀錄。

皇馬教練安察洛堤賽後表示：「我哋今場未發揮到最好，但亦值得贏波。近年國家打吡好難預測，我哋作客試過贏4比0、4比1，佢哋亦喺巴拿貝贏過4比0，雙方都好有實力，決賽結果好難預料。」