【官宣】阿密特續約曼聯5年　人工勁加300%

曼聯自從魯賓艾摩廉執教後，成績暫時未見起色，不過有部份球員嘅演出就明顯提升，小將阿密特迪亞路憑近期精彩演出，獲曼聯大幅加薪續約，周五(10日)正式簽約至2030年。

阿密特合約原本夏天到期，曼聯有權延長多1年，但球會深信呢位22歲小將仲有得再爆，所以開出5年半長約，人工由原來3萬鎊周薪，增加到12萬鎊周薪。

阿密特續約後表示：「好榮幸簽呢份合約，我喺曼聯有好多美妙時刻，而且將來陸續有來，我希望喺曼聯創造歷史，雖然今季好艱難，但係我深信球會依家向住正確方向前進。」

阿密特今季大爆發，各項賽事合共有6個入波同7次助攻，喺魯賓艾摩廉上任後有2入波同5助攻，深受球迷愛戴。