摧毀楊格父子「童話對決」　費格遜被鬧爆

周五(10日)凌晨英足盃第3圈，愛華頓對彼德堡一仗話題十足，賽前愛華頓突然宣布炒領隊戴治成為熱話，而另一焦點係楊格父子「童話式」對壘，雖然老竇艾舒利楊格有份落場，但囝囝泰拿楊格就坐足全場，彼德堡領隊戴倫費格遜做法受到批評，更被愛華頓球員出言侮辱！

喺英足盃154年歷史上，從未有父子對場對壘，愛華頓嘅艾舒利楊格同彼德堡嘅泰拿楊格今場都任後備，77分鐘艾舒利楊格率先登場，可惜彼德堡之後用最後兩個換人名額，都冇起用18歲嘅泰拿楊格，令經典一幕無緣出現，楊格父子只能喺完場後先喺球場上重逢。

彼德堡領隊戴倫費格遜係曼聯傳奇領隊費格遜個仔，佢賽後解釋：「唔派泰拿上陣係好困難嘅決定，但我當時要作出對球隊最好嘅選擇，我都好想泰拿落場，如果當時輸緊0比2，我一定會出泰拿，但當時只係0比1，我要換入前鋒去博一鋪。」戴倫費格遜之後更不滿表示：「有個愛華頓球員走嚟畀說話我聽，簡直係無法無天，我哋唔係慈善組織！」