筍盤流出！拿玻里掛牌賣「基華拉當拿」　

冬季轉會窗突然出現「筍盤」，格魯吉亞翼鋒基華拉斯基利亞因為拒絕續約，已被拿玻里即時掛牌出售，雖然叫價高達8,000萬歐元，但已引嚟一眾豪門爭奪，據報英超「1哥」利物浦亦將會出手，同巴黎聖日耳門、車路士等搶人！

呢位綽號「基華拉當拿」嘅23歲翼鋒，同拿玻里合約去到2027年夏天，不過佢早已表明離隊決心，亦拒絕傾談續約，拿玻里就決定趁早用高價賣走。據報巴黎聖日耳門、車路士都對佢好有興趣，估唔到連擁有豪華鋒線嘅利物浦亦加入戰團。

據《The Athletic》同多位權威記者報道，利物浦本來並冇特別計劃喺1月份買攻擊球員，但佢哋視基華拉斯基利亞被掛牌為「特殊事件」，如果有機會用合理價錢引入呢種頂尖球星，利物浦亦會願意出手，事實上佢哋季前亦曾打基華拉斯基利亞主意，但最終未能成事，改為簽入費達歷高基艾沙。

利物浦上年已經提早簽入格魯吉亞門將馬馬達舒維利，佢會喺今年7月份正式加盟，如果成功簽埋基華拉斯基利亞，就可以盡攬「格魯吉亞孖寶」。