車路士清貨賣6星　有2個加盟只有半年

車路士近年瘋狂擴軍後，陣容出現人滿之患，據報冬季轉會窗打算清洗6名球員，法國前鋒尼干古「上榜」最受注目，而清洗名單中有2人加盟只得半年左右，咁快被踢走認真慘情。

英國《太陽報》報道，車路士同意畀6名「邊緣球員」離隊，只要收到合適報價就可以放人，名單包括尼干古、連拿度維加、阿素迪沙斯、卡尼卓克禾美卡、卡沙迪同達斯貝利賀爾。

6人當中只有法國前鋒尼干古屬於主力梯隊，但以佢嘅級數，當然唔甘心只係做副手，傳聞曼聯、巴黎聖日耳門同巴塞隆拿都對佢有興趣。

另外，葡萄牙國腳連拿度維加同英格蘭中場達斯貝利賀爾都係上年夏天加盟，不過一直搶唔到正選位置，半年「試用期」完結後慘被放棄。