熱刺商借高路梅安尼　祖記有意截胡

1月轉會窗暗流湧動，巴黎聖日耳門法國射手高路梅安尼，成為熱刺同祖雲達斯嘅爭奪戰場，據報熱刺積極斟介，主帥普斯迪高路甚至作出上陣時間保證承諾，但祖記突然殺出，準備截胡。

高路梅安尼於2022年世界盃決賽，補時尾段單刀埋門被達米安馬天尼斯救出，最終法國落敗痛失冠軍，而當年高路梅安尼仍然成為搶手貨，身價最高去到8,000萬歐元，不過近年佢喺PSG發展一般，身價亦拾級而下，現時估值為3,000萬歐元。

今個冬窗期間，熱刺積極增兵，睇中呢位法國國腳，向PSG提出先借後買方案，買斷轉會費高達6,000萬歐元(約4.8億港元)，主帥普斯迪高路更親自向球員承諾，保證有一定上陣機會，充滿誠意。

當交易順利完成之際，祖雲達斯在關鍵時刻介入，希望擊敗熱刺，爭取高路梅安尼轉戰意甲，暫時3方面陷入膠着狀態，睇嚟要過一段時間先有結果。