莫耶斯回巢愛華頓　將簽約2年半

愛華頓早前炒咗領隊戴治之後，迅速搵到新帥，根據英國各大傳媒及「轉會權威」記者羅曼諾(Fabrizio Romano)爆料，「拖肥糖」已經斟掂莫耶斯回巢領軍，雙方將於周六(11日)稍後時間，正式簽約2年半。

莫耶斯上季結束後離開韋斯咸，一直未有教職在身，愛華頓趁機邀請佢出山執教，雙方已經達成協議，將會簽約至2027年6月。現年61歲嘅莫耶斯曾於2002至13年執教愛華頓長達11年，取得不俗成績，包括打入2009年英足盃決賽，可惜不敵車路士。

莫耶斯教波能力備受認同，甚至獲曼聯傳奇主帥費格遜欽點為接班人，2013年接替費Sir，成為紅魔鬼主帥，但成績令人失望，未夠一季就被炒。

莫耶斯脫「魔」後曾經執教皇家蘇斯達、新特蘭、韋斯咸，最威水係率領韋斯咸奪得2023年歐協聯冠軍。「莫天才」教弱隊有一手，加上喺愛華頓歷史上有重要地位，由佢回巢救亡，絕對係最佳人選。