港超聯　盧卡斯奠勝：攞冠軍係唯一目標

大埔運動場周六（11日）上演「中銀人壽香港超級聯賽」，最終大埔以1球擊敗理文，今場一箭定江山的中鋒盧卡斯（Lucas），賽後對於球隊重返勝軌感到高興，形容球隊今仗成功把握主場之利，會繼續以爭標為首要目標。

盧卡斯於開場僅9分鐘已打開記錄，為大埔奠勝，他對自己和隊友的表現感到滿意：「今場發揮都唔錯，但更加要多謝我班隊友落力防守，同時創造唔少機會畀我入波，今場我哋打配合嘅默契絕對係贏波關鍵。」提到上周意外不敵港會，盧卡斯表示士氣未有受上仗影響：「上星期作客失分的確有啲失望，港會個仿草場比較窄，令到我哋發揮得麻麻，我哋會避免再有同類情況發生。今日我哋踢出應有水準，成功守住主場攞番3分，希望嚟緊可以表現得更好。」

盧卡斯今季聯賽擔正12場，累計射入9球，位列聯賽射手榜首位，對於神射手名銜盧卡斯並不過於在意，強調自己的目標是為球隊爭標：「雖然做到神射手係件好事，但唔係我今季嘅個人目標，我只係想大埔今季攞冠軍，同球隊一齊捧盃先至係我最渴望嘅嘢。」