佐真奴想提早解約　下一站巴甲

阿仙奴中場佐真奴費路今季長坐冷板，根據《ESPN》爆料，呢位33歲意大利國腳打算提早半年解約，今個月離隊，佢嘅經理人已經接觸彭美拉斯，希望促成佐真奴「認祖歸宗」加盟呢支巴甲球隊。

佐真奴費路2年前由車路士轉投阿仙奴，上季各項賽事上陣36場入1球，但佢今季被兵工廠主帥阿迪達投閒置散，總共只上陣820分鐘，感到意興闌珊，加上只剩下半年合約，所以希望趁今個月轉會市場重開，提早解約離隊。

有消息指彭美拉斯方面已經同佐真奴費路嘅經理人展開會談，希望簽入呢位老將，佐真奴亦有興趣加盟，其中一個原因係彭美拉斯已獲得今夏世冠盃參賽資格。

事實上，佐真奴費路本身係巴西人，2007年離鄉背井去意大利生活，加入維羅納青年軍，9年前選擇代表意大利國家隊，並成為奪得2021年歐國盃冠軍嘅功臣，佐真奴費路返回巴西搵食，應該好容易適應。