車路士中堅重炮「起孖」　進攻秘密武器？

英足盃第3圈出現多場大炒，車路士周六(11日)主場5比0大勝英乙摩甘比，不過戰情冇戰果睇落咁輕鬆，全靠中堅艾達拉比奧約兩下「重炮」先順利贏波，佢賽後更自爆未能「戴帽」有啲失望。

賽前一致預料車路士可以輕鬆大炒，不過尼干古17分鐘12碼宴客，車仔遲遲搵唔到缺口，直到40分鐘艾達拉比奧約禁區頂推順遠射，個波省中對手後防嘅背脊彈入，幸運領先1比0返更衣室。

換邊後車路士嚟料，尼干古50分鐘射入2比0，70分鐘艾達拉比奧約再施重炮，今場禁區頂轟入世界波，加上祖奧菲歷斯喺75分鐘同77分鐘閃電連入2球，最終帶領車路士大勝5比0。

車仔領隊馬利斯卡表示：「艾達拉比奧約係唯一有空位帶波球員，佢不嬲射門都唔差，問題係作為中堅，去禁區頂機會唔多。」被問到會唔會安排佢多啲上前射門，馬利斯卡回應：「唔好講到咁誇啦！」

至於艾達拉比奧約就話：「尾段我每次拎波，都聽到球迷大叫『射波』，我都好想可以入多球，但係離龍門實在太遠，能夠展示自己嘅才能令人開心。」