车路士中坚重炮“起孖”　进攻秘密武器？

英足杯第3圈出现多场大炒，车路士周六(11日)主场5比0大胜英乙摩甘比，不过战情冇战果睇落咁轻松，全靠中坚艾达拉比奥约两下“重炮”先顺利赢波，佢赛后更自爆未能“戴帽”有啲失望。

赛前一致预料车路士可以轻松大炒，不过尼干古17分钟12码宴客，车仔迟迟搵唔到缺口，直到40分钟艾达拉比奥约禁区顶推顺远射，个波省中对手后防嘅背脊弹入，幸运领先1比0返更衣室。

换边后车路士嚟料，尼干古50分钟射入2比0，70分钟艾达拉比奥约再施重炮，今场禁区顶轰入世界波，加上祖奥菲历斯喺75分钟同77分钟闪电连入2球，最终带领车路士大胜5比0。

车仔领队马利斯卡表示：“艾达拉比奥约系唯一有空位带波球员，佢不嬲射门都唔差，问题系作为中坚，去禁区顶机会唔多。”被问到会唔会安排佢多啲上前射门，马利斯卡回应：“唔好讲到咁夸啦！”

至于艾达拉比奥约就话：“尾段我每次拎波，都听到球迷大叫‘射波’，我都好想可以入多球，但系离龙门实在太远，能够展示自己嘅才能令人开心。”