「耶穌」都留唔住！捷西斯重傷或提早收咧

阿仙奴連續喺兩個盃賽失利，本身已經人手短缺嘅鋒線再受打擊，「耶穌」加比爾捷西斯喺對曼聯一仗被擔架抬離場，懷疑膝部十字韌帶出事，最壞情況要抖9個月以上。

阿仙奴進攻王牌布卡約沙卡早前做完手術，最快要3月先可以復出，頂替佢嘅新星尼華尼利亦受傷要抖幾個星期，今場輪到捷西斯踢右翼，佢上半場回防整傷膝頭，要由擔架抬走。

阿仙奴領隊阿迪達賽後表示：「好擔心，呢個係我嘅感覺，佢要瞓住擔架走，非常痛苦而要摸住膝頭，情況不妙。」捷西斯自2022年世盃嚴重膝傷後，今次係佢近2年第5次出現膝傷患。

據體育醫療網站《Physio Scout》分析，根據捷西斯受傷情況，最大機會係前十字韌帶受傷，屬實嘅話將要抖9個月以上；就算係程度較輕嘅半月板傷患，都要抖3至4個月，今季好可能提早收咧。