久保建英入靚波　阿仙奴出手未

周二(14日)凌晨西甲，皇家蘇斯達主場以1比0擊敗維拉利爾，久保建英個人表演，跑咗大半個球場，射入全場唯一入波。呢位23日本國腳合約內有6,000萬歐元(約4.79億港元)毀約金條款，早前傳出阿仙奴計劃直接買斷佢，久保建英今仗以行動證明身價，似乎想兵工廠盡快出手。

兩隊實力旗鼓相當，並正在力爭打入前4位，今仗互相鬥攻，維拉利爾前鋒泰亞路巴利曾經錯失1次半單刀機會，皇蘇亦有盧卡蘇錫射門中柱。戰至51分鐘，皇蘇打反擊，久保建英由後場狂奔，接應長傳，力壓對手，搶到波後長驅直進射入，取得今季第4個聯賽入波，佢呢4場入波，皇家蘇斯達都勝出兼不失球，其中2場為球隊一箭定江山，可見久保建英喺皇蘇發揮極關鍵作用，難怪獲阿仙奴垂青。

由於兵工廠前鋒加比爾捷西斯上場英足盃受重傷，面臨長抖，另1位進攻主力布卡約沙卡仍在養傷，可能趁今個月轉會市場開啟增兵，久保建英屬於熱門人選。