季前當人垃圾　車路士急Call查洛巴救亡

車路士周四(16日)宣布，提前終止將杜利華查洛巴外借水晶宮嘅合約，呢位25歲中堅會即時歸隊，以解車路士後防兵荒問題。查洛巴季前被領隊馬利斯卡當垃圾掃走，估唔到依家隨時成為車路士救星。

25歲嘅查洛巴係車路士青訓產品，不過季前被馬利斯卡放棄，而且為逼佢轉會，季前集訓唔畀佢跟隊，又唔分配球衣號碼畀佢，甚至唔畀佢跟一隊練波，只能跟預備組練習，最終喺夏天轉會窗完結前，獲外借去水晶宮到季尾。

不過，隨住韋斯利科芬拿同班洛特巴迪亞舒尼2大中堅受傷，車路士就決定啟動合約內回收條款，要查洛巴即時歸隊救亡。水晶宮領隊格拉斯拿無奈表示：「呢個係合約問題，查洛巴好希望留低，但車路士有權做出呢個(提前回收)決定。」